QC LGU nakipag-partner sa DHSUD para sa bagong rental housing units

Nakipag-partner si Joy Belmonte, alkalde ng Quezon City, sa Department of Human Settlements and Urban Development (DHSUD) para sa pagpapatayo ng mga bagong rental housing unit para sa mga pamilyang informal settler, kabilang ang mga nakatira sa mga danger zone.

Ayon sa alkalde, pormal na sinelyuhan ng lokal na pamahalaan ang pakikipagtulungan kay Human Settlements Secretary Jose Ramon Aliling sa pamamagitan ng paglagda sa isang memorandum of agreement. Layunin ng kasunduan ang pagtatayo ng mga medium-rise building sa mga distrito ng Sauyo at Bagong Silangan. Ang mga gusaling ito ay ilalaan para sa rental housing modality sa ilalim ng Expanded Pambansang Pabahay para sa Pilipino (4PH) Program na ipinatutupad ng DHSUD at mga ahensya nito.

Ayon kay Secretary Aliling, tinatayang nasa halos 3,000 katao, partikular ang mga naninirahan sa gilid ng mga daluyan ng tubig at iba pang danger zone, ang makikinabang sa mga panukalang proyekto sa pabahay. Sa kasalukuyan, isinasapinal na ng lokal na pamahalaan at ng DHSUD ang mga detalye ng dalawang rental housing project.

Matatandaan na ang kauna-unahang proyekto ng DHSUD sa lugar ay ang Marilag Residences na matatagpuan sa loob ng University of the Philippines Diliman, na inaasahang makikinabang din ang humigit-kumulang 3,000 katao.