Unang anibersaryo ng Tomas Morato Car-Free Sundays sa QCPD

Ipinagdiwang ng Quezon City Police District (QCPD), sa pamamagitan ng District Community Affairs and Development Division (DCADD), ang unang anibersaryo ng Car-Free, Carefree Tomas Morato Sundays noong 7 Disyembre.

Tampok sa pagdiriwang ang Walk for Clean Air Campaign, na nagsimula sa National Children’s Hospital, na may temang “Walk for Clean Air: Walk for the Future, Walk for Our Children,” na inorganisa ng Health Care Without Harm Southeast Asia at 350 Pilipinas. Nakibahagi si Acting District Director P/Col. Randy Glenn Silvio sa paglalakad at nagbisikleta rin sa ruta.

Nagkaroon din ng iba’t ibang wellness at recreational activities sa kahabaan ng Scout Rallos Street, kabilang ang Zumba, pagbibisikleta, skating, at jogging.

Naglagay ang Quezon City Health Department (QCHD) ng Know Your BMI station at Mental Health Booth upang magbigay ng mga serbisyong pangkalusugan sa mga dumalo.

Layunin ng anibersaryo na palawakin ang kaalaman tungkol sa polusyon sa hangin at itaguyod ang pakikilahok ng komunidad sa mga inisyatibang pangkalusugan at pangkapaligiran.