PNP, nakaalerto sa posibleng mga pagkilos kasabay ng ICC hearing ni Dutere

Nakaalerto ang iba’t ibang regional unit ng pulisya para sa inaasahang mga rally na sasabay sa pre-trial ng International Criminal Court (ICC) laban kay dating Pangulong Rodrigo Duterte ngayong Lunes.

Ito ay kasunod ng direktiba ni PNP Chief Gen. Jose Melencio Nartatez Jr. sa mga regional director na magpreposition ng mga Civil Disturbance Management Unit at mga medical emergency responder upang matiyak ang kaayusan at kaligtasan ng publiko.

Inatasan din ni Nartatez ang lahat ng yunit ng PNP na magpatupad ng heightened preparations, habang naka-full alert status naman ang National Capital Region Police Office (NCRPO) simula pa noong Sabado kaugnay ng nalalapit na anibersaryo ng People Power.

Tiniyak ng PNP na paiiralin ang maximum tolerance at mananatiling propesyonal sa paghawak ng mga pagtitipon.

Nakatakda namang umarangkada ang apat na araw na pagdinig mamayang alas-singko ng hapon (oras sa Pilipinas) kaugnay ng mga kasong crimes against humanity na may kinalaman sa war on drugs ng dating pangulo.