Hindi sasali ang Vatican sa “Board of Peace” na inilunsad ni U.S. President Donald Trump, ayon sa Holy See, na binigyang-diin ang kahalagahan ng United Nations sa paghawak ng mga pandaigdigang krisis.

Sinabi ni Cardinal Pietro Parolin na may mga “critical issues” sa istruktura at mandato ng inisyatiba na nangangailangan ng paglilinaw. Ayon sa Vatican, mahalaga na ang United Nations ang manguna sa ganitong mga sitwasyon sa international level.

Ang Board of Peace ay unang iniugnay sa rehabilitasyon at pamamahala ng Gaza, ngunit kalaunan ay pinalawak bilang global initiative na pinamumunuan ni Trump. Tinawag ng White House na “deeply unfortunate” ang desisyon ng Vatican.

May ilang bansa at kaalyado ng Estados Unidos ang tumanggi ring pormal na lumahok, gaya ng Britain, France, at Norway, habang ang iba ay dadalo bilang observers. Ilang eksperto ang nagtaas ng katanungan tungkol sa balangkas at posibleng epekto nito sa umiiral na international mechanisms.

Patuloy namang nananawagan ang Vatican para sa proteksiyon ng mga sibilyan at mapayapang resolusyon ng mga sigalot. Si Pope Leo XIV ay naunang umapela para sa two-state solution at karapatan ng mga Palestinian na mamuhay nang mapayapa sa sariling lupain.

Batay sa mga ulat, mahigit 70,000 Palestinian na ang nasawi sa Gaza conflict. Nagbabala ang humanitarian organizations tungkol sa malawakang displacement, kakulangan sa pagkain, at pinsala sa mga sibilyan. Iginiit ng Israel na ang mga operasyon nito ay bahagi ng self-defense kasunod ng pag-atake ng Hamas noong 2023.

Nakatakdang idaos ang unang pulong ng Board of Peace sa Washington.