Pinadali na ng Embahada ng Korea ang mga requirements sa pagkuha ng visa para sa mga Pilipino. Simula ngayong ika-20 ng Pebrero, hindi na kailangang magsumite ng tatlong buwang bank statement para sa visa application.

Ayon sa Korean Visa Application Center Philippines, layunin ng hakbang na ito na gawing mas mabilis at maginhawa ang proseso, at mahikayat ang mas maraming turistang Pilipino na bumisita sa Korea.

Para naman sa mga estudyanteng aplikante, maaari nang magsumite ng original na school certificate o kopya ng kanilang student ID.

Samantala, ang mga karaniwang dokumento tulad ng invitation letter, patunay ng relasyon sa pamilya, at mga dokumento mula sa kumpanya para sa multiple applicants ay maaaring isumite sa iisang kopya at isama sa file ng kinatawan ng aplikante.

Matatagpuan ang visa application center ng Korea sa Brittany Hotel sa Taguig. Dito tinatanggap ang lahat ng aplikasyon at inilalabas ang visa at pasaporte na sinusuri ng Embahada ng Korea sa Maynila.