Umabot sa 284 boto mula sa mga miyembro ng House of Representatives noong Martes ang nagpapatunay na tama ang desisyon ng Committee on Justice sa pag-reject ng dalawang impeachment complaints laban kay Pangulong Ferdinand “Bongbong” R. Marcos Jr., na nagpapakita ng malinaw na suporta sa kanilang konklusyon na kulang sa substantive grounds ang kaso at hindi karapat-dapat ituloy.

Ayon kay Justice Committee Chairperson Jerville “Jinky Bitrics” Luistro ng Batangas, ang labis na bilang ng boto ay lampas pa sa one-third threshold na nakasaad sa Konstitusyon at malinaw na nagpapatunay sa katumpakan ng hatol ng panel.

“Sa 284 boto, malinaw na ipinapakita ng Kamara na tama ang hakbang ng justice panel — at ang impeachment, gaya ng binigyang-diin ng mga mambabatas, ay dapat manatiling constitutional safeguard, hindi instrumento para sa political theater,” ani Luistro.

Aniya pa, “Hindi lang ito one-third, naabot pa ang 284. Napabilib nga ako sa 284 boto. Napakalakas nito at nagpapakita lamang, sa aking mapagpakumbabang pananaw, na tama ang naging desisyon ng mga miyembro ng Committee on Justice.”

Sa boto na 284-8 na may apat na abstentions, inaprubahan ng House ang rekomendasyon ng justice panel na i-dismiss ang mga reklamo dahil sa kakulangan sa substansiya.

Inaprubahan ng plenaryo ang Committee Report No. 111, na isinumite ng Committee on Justice hinggil sa House Resolution (HR) No. 746, na pinamagatang: Resolution Dismissing the complaints for impeachment filed by Atty. Andre R. De Jesus at Liza Maza, Teodoro A. Casiño, Renato Reyes, Jr., Atty. Neri Colmenares, at iba pa laban kay Pangulong Ferdinand “Bongbong” R. Marcos Jr.

Ayon kay Luistro, ang boto rin ay nag-trigger ng one-year constitutional bar sa pag-file o pagtanggap ng panibagong impeachment complaint laban sa Pangulo.

“Na-initiate po itong impeachment complaint noong 26 January 2026… at base sa ruling sa Francisco v. House of Representatives, ang referral sa Justice Committee ang nag-umpisa ng one-year prohibition period,” paliwanag niya, idinagdag na hanggang 26 January 2027, bawal mag-file ng bagong impeachment complaint laban sa Pangulo.

Tinanong kung puwede bang mag-refile ang parehong complainants sa susunod na taon gamit ang parehong alegasyon, sinabi ni Luistro na posible ito dahil hindi tinugunan ng panel ang substantive merits ng kaso.

“Sa tingin ko puwede, kasi wala namang res judicata… hindi naman tinalakay nang buo ang substance…” ani Luistro, habang binibigyang-diin na anumang muling paghahain ay dapat ayusin ang mga kakulangan na itinuro ng committee, kabilang ang kakulangan sa personal knowledge, kawalan ng authentic records, hindi maipakita ang factual nexus o koneksyon, at kawalan ng personal participation ng impeachable official.