Salpukan ng Lakers, Spurs sa West inaabangan

DRINIBOL ni Luka Doncic (#77) ng Los Angeles Lakers ang bola sa kanilang laban kontra Phoenix Suns noong 15 Nobyembre 2026 sa Mortgage Matchup Center sa Phoenix, Arizona.
BARRY GOSSAGE/Agence France-Presse
Namamayagpag ngayon sa Western Conference ng 2026-2027 NBA season ang Los Angeles Lakers at San Antonio Spurs, na kapwa nagpapamalas ng malakas na opensa at depensa ngayong unang bahagi ng kampanya.
Tinatayang 122.8 puntos kada laro ang naiaambag ng Lakers sa kanilang mga laban. Sa kabila ng 14 na laro pa lamang sa kanilang kampanya, malaki ang naitutulong ng kanilang produktibong opensa upang manatili sa unahan ng mabigat na Western Conference.
Patunay diyan ang mala-MVP na performance ng kanilang superstar na si Luka Doncic, na kabilang sa mga nangunguna sa scoring leaderboard sa kanyang 40.1 puntos at 7.8 assists kada laro.
Marami ang umaasang makukuha ni Doncic ang season MVP trophy ngayong taon, matapos ang ilang sunod-sunod na kampanya kung saan kabilang siya sa mga pangunahing kandidato para sa parangal.
Samantala, pinangungunahan naman ni seven-foot-four center Victor Wembanyama ang pag-arangkada ng San Antonio Spurs. Mayroon siyang average na 28.6 puntos, 11.6 rebounds at 4.3 blocks kada laro, na nagpapakita ng kanyang malaking ambag sa magkabilang dulo ng court.
Nagtatala rin si Wembanyama ng 95.1 defensive rating, na nagpapakita ng kanyang husay sa pagpigil sa opensa ng mga kalaban.
Sa kasalukuyang standings, magkapantay ang Lakers at Spurs sa 12-2 kartada, kung saan nasa unang puwesto ang San Antonio at ikalawa ang Los Angeles.







