Skip to content
DYARYO TIRADA

Criss Cross, nanaig kontra FEU

Criss Cross, nanaig kontra FEU
Text size

Nakaligtas ang defending champion na Criss Cross sa matinding limang-set na laban kontra Far Eastern University (FEU)-DN Steel, 25-22, 25-18, 23-25, 19-25, 15-10, upang tapusin ang elimination round nang walang talo at palakasin ang kumpiyansa bago ang semifinals ng Spikers’ Turf Season 10 Invitational Conference nitong Huwebes sa Mall of Asia Arena.

Nanguna si Jude Garcia sa King Crunchers matapos magtala ng 26 puntos at tulungan ang koponan na makumpleto ang 9-0 sweep sa eliminations.

Nagpakawala ang dating manlalaro ng FEU ng 24 attack points at dalawang kill blocks, bukod pa sa 15 excellent receptions at anim na digs.

Nag-ambag naman si Jaron Requinton ng 17 puntos, habang 15 puntos ang naitala ni Noel Kampton mula sa attacks at 11 puntos kay Edilyn Colinares.

Ito na ang ikaapat na pagkakataong winalis ng Criss Cross ang elimination round.

“It’s all about the team’s trust in each other and the trust of our coaches. You can see that all the players fielded were able to contribute,” ani Garcia, ang limang beses na Most Valuable Player.

“I think that’s the best thing that we’ll bring into the semifinals.”

Nagtala rin si Adrian Villados ng 21 excellent sets upang tulungan ang King Crunchers na makakuha ng 68 attack points.

Also read Rosario hahalili kay Abando

Naging mahalaga ang karanasan at kalmadong laro ng Criss Cross sa mga huling sandali ng deciding set.

Nagtulungan sina Garcia at Kampton sa paghatid ng mahahalagang puntos upang tuluyang selyuhan ang panalo sa loob ng dalawang oras at 11 minuto.

Tinapos naman ng Tamaraws ang eliminations tangan ang 6-3 kartada.

Nanguna para sa FEU-DN Steel sina Mikko Espartero at Lirick Mendoza na may tig-12 puntos, habang nagdagdag sina Dryx Saavedra at Charles Absin ng 11 at 10 puntos, ayon sa pagkakasunod.

Kasama ng King Crunchers at Tamaraws sa round-robin semifinals ang Savouge, National University-Archipelago Builders at dalawang foreign guest team.

Your sign today

Pick your Chinese zodiac sign for a daily forecast by Master Hanz Cua.