Arestado ang isang 56-anyos na public school principal kaugnay ng pagpatay sa isang 36-anyos na gurong pitong buwang buntis sa bayan ng Tayum, Abra.

Ayon sa pulisya, inaresto ang suspek habang nasa kanyang opisina sa isang pampublikong paaralan sa bayan ng Lagangilang.

Positibong kinilala ng isang testigo ang suspek bilang gunman na bumaril at pumatay kay Maria Elaine Valencia noong 8 Mayo.

Batay sa salaysay ng testigo, sakay ang suspek ng isang motorsiklong minamaneho ng isa pang lalaki nang isagawa ang pamamaril.

Sa imbestigasyon, napag-alaman na nadiskubre umano ng biktima ang pakikipagrelasyon ng suspek sa kanyang anak na nagsimula umano noong 12 taong gulang pa lamang ito.

Hinala ng mga awtoridad, pinatay ang biktima upang patahimikin siya at mapigilan ang umano'y plano nitong magsampa ng kaso laban sa naturang school principal.