Trump, naglunsad ng bagong 10 percent global tariff, inatake ang desisyon ng SC

Nagpatupad si U.S. President Donald Trump ng bagong 10 percent global tariff sa imports matapos ibasura ng U.S. Supreme Court ang malaking bahagi ng nauna niyang tariff policy.

Sa botong 6-3, sinabi ng Supreme Court na lumampas sa kapangyarihan ng pangulo ang paggamit ng International Emergency Economic Powers Act para magpataw ng malawakang tariffs. Ayon sa desisyon, hindi nagbibigay ang batas ng sapat na awtoridad para magtakda ng import taxes nang walang pahintulot ng Kongreso.

Ang tariffs ay buwis na ipinapataw sa mga inaangkat na produkto. Karaniwang porsiyento ito ng halaga ng goods at binabayaran ng mga kumpanyang nag-i-import. Sa praktika, madalas naipapasa ang dagdag-gastos sa consumers sa pamamagitan ng mas mataas na presyo.

Sa kabila ng ruling, iginiit ni Trump na mananatili ang umiiral na tariffs at gagamit siya ng ibang legal na basehan.

“Effective immediately, all national security tariffs under Section 232, and existing Section 301 tariffs — they’re existing, they’re there — remain in place, fully in place, and in full force and effect,” pahayag ni Trump.

“Today, I will sign an order to impose a 10 percent global tariff under Section 122, over and above our normal tariffs already being charged.”

Pinapayagan ng Section 122 ng Trade Act of 1974 ang pangulo na magpataw ng tariffs na maaaring tumagal ng hanggang 150 araw. Anumang extension lampas dito ay mangangailangan ng aksyon mula sa Kongreso. Inaatasan din ng batas na maging nondiscriminatory ang ganitong tariffs, o pantay na ipatupad sa trading partners.

Tinawag ni Trump na “deeply disappointing” ang Supreme Court decision at binatikos ang ilang mahistrado, kabilang ang mga itinalaga niya noon. Inakusahan din niya ang korte na umano’y “swayed by foreign interests.”

Sa usapin ng posibleng refunds para sa mga kumpanyang nagbayad ng tariffs sa ilalim ng invalidated authority, sinabi ni Treasury Secretary Scott Bessent na maaaring tumagal ang proseso.

“My sense is that could be dragged out for weeks, months, years,” ani Bessent.

Ipinahiwatig din ng White House na may paparating pang trade investigations at karagdagang hakbang. Ayon kay U.S. Trade Representative Jamieson Greer, mananatili ang direksyon ng programa.

“We have a lot of tools out there,” sabi ni Greer.

Samantala, nanatiling positibo ang galaw ng Wall Street markets sa kabila ng bagong anunsyo ng tariffs.

Hiwalay sa trade policy, muling binanggit ni Trump ang Iran sa kanyang mga pahayag. Iginiit niya ang pressure para sa panibagong nuclear deal at nagbabala ng military action kung mabibigo ang negosasyon.