Dating nobyo ng freelance model na si Gina Lima, natagpuang patay sa condo

Natagpuang wala nang buhay si Ivan Ronquillo, dating nobyo ng yumaong freelance model na si Gina Lima, sa loob ng kanilang condo unit kaninang umaga.

Ayon kay Lt. Col. Jose Luis Aguirre, station commander ng La Loma Police Station sa Quezon City, si Ronquillo ay natagpuan sa parehong unit kung saan una ring nasawi si Lima. Naitakbo pa umano siya sa ospital upang subukang irevive ng mga doktor, ngunit idineklara na itong patay pagdating doon.

Sa paunang imbestigasyon, nilinaw ng mga awtoridad na walang kinalaman si Ronquillo sa pagkamatay ni Lima. Wala rin umanong nakitang senyales ng strangulation o anumang pasa ng pambubugbog sa katawan ng biktima.

Nang dalhin ni Ronquillo sa ospital ang dating kasintahan, isinailalim din siya sa imbestigasyon bilang bahagi ng standard operating procedure ng pulisya. Base sa resulta, napatunayang wala siyang kaugnayan sa pagkamatay ni Lima.

Nagbahagi rin si Ronquillo ng mga post sa kanyang Facebook account kung saan makikita ang sugat sa kanyang mukha, na umano’y dulot ng pambubugbog ng ilang kaibigan ni Lima. Ibinahagi rin niya ang huling sandaling kasama niya ang dating kasintahan at ang oras kung kailan niya natuklasang wala na itong buhay sa kaniyang tabi.

Matatandaang nitong linggo nang gabi naiulat ang pagkasawi ni Lima. Ayon sa ulat, dinala pa siya ni Ronquillo sa Quezon City General Hospital, ngunit idineklara itong dead on arrival dahil sa cardio-respiratory distress, na posibleng dulot ng drug overdose batay sa mga narekober na ilegal na droga ng mga tauhan ng SOCO ng QCPD Forensic Unit.

Sa ngayon, isinailalim na sa autopsy ang bangkay ni Lima upang matukoy ang tunay na sanhi ng kanyang pagkamatay.