Nakatanggap ng condominium unit na nagkakahalaga ng P2.266 milyon mula sa National Housing Authority (NHA) ang pamilya ng yumaong manlalaro ng men's basketball team ng Ateneo de Manila University na si Rene Clert "Bobet" Baterbonia sa Talacogon, Agusan del Sur.

Inanunsyo ng Pamahalaang Panlalawigan ng Agusan del Sur ang nasabing tulong at ibinahagi ang mga larawan ng kanyang mga magulang na sina Rene Sr. at Rovelyn habang nilalagdaan ang mga dokumento sa tulong ng mga kinatawan ng NHA.

Si Rene Sr. ay isang tricycle driver, habang si Rovelyn naman ay nagtitinda ng isda sa palengke upang matustusan ang pang-araw-araw na pangangailangan ng kanilang pamilya.

Nagbahagi rin ang pamahalaang panlalawigan ng larawan ng kasalukuyang tahanan ng pamilyang Baterbonia, na ilang beses nang binaha sa nakalipas na mga taon.