PNP nagsisiyasat sa reklamong pang-aabuso ng kagawad sa isang 11 anyos

Nagpadala na ng mga tauhan si Philippine National Police Chief General Jose Melencio Nartatez Jr. upang tumulong sa isang 11 taong gulang na batang babae na sumulat kay Pangulong Bongbong Marcos Jr. upang ireklamo ang umano’y pang-aabuso ng isang barangay kagawad sa isang bayan sa Camarines Sur.

Humingi ng tulong ang bata sa pamamagitan ng isang open letter na kanyang ipinost sa social media na nakatuon sa Pangulo.

Sa kanyang liham, isiniwalat niya ang sinasabing pang-aabuso ng naturang opisyal ng barangay.

Ayon sa bata, pinutulan umano sila ng suplay ng kuryente at tubig, at sinira pa ang kanilang mga pananim bilang paraan ng pananakot at harassment.

Ang biktima ay kabilang sa mga batang walang tirahan na kasalukuyang inaalagaan ng Redeemer Homeless Mission, isang non-profit organization.

Sa ngayon, nagpapatuloy ang imbestigasyon kaugnay sa mga alegasyon ng pang-aabuso na inilantad sa liham ng bata laban sa opisyal ng barangay.