Natagpuan ang bangkay ng isang hindi pa nakikilalang babae sa isang bangin sa kahabaan ng Marcos Highway sa Sitio Cabading, Barangay San Jose, Antipolo City noong Huwebes ng hapon, 22 Enero 2026.

Ayon sa pulisya, tinatayang nasa limang talampakan ang taas ng biktima, may maliit na pangangatawan, at suot ang puting T-shirt at denim shorts nang matagpuan.

Wala umanong nakuhang anumang identification card o personal na dokumento mula sa biktima. Gayunman, may ilang natatanging tattoo sa kanyang katawan na maaaring makatulong sa pagkakakilanlan. Kabilang dito ang tattoo ng ahas na may pangalang “Noimi” sa kaliwang hita, at tattoo ng gagamba sa ibabang kaliwang bahagi ng kanyang tiyan.

Agad na nagsagawa ng crime scene investigation ang mga operatiba ng Scene of the Crime Operatives (SOCO) ng Rizal Police Provincial Office at sinimulan ang pagrepaso sa mga CCTV footage sa mga kalapit na lugar. Humiling na rin ang mga awtoridad ng autopsy examination upang matukoy ang sanhi ng pagkamatay ng biktima.

Patuloy ang imbestigasyon ng pulisya upang makilala ang babae at matukoy kung sino ang responsable sa kanyang pagkamatay.