Inanunsyo ng Department of Transportation (DoTR) na mas pinaaga na ang pagsisimula ng magdamagang libreng sakay sa EDSA Bus Carousel dahil sa halip na Disyembre 15, sisimulan na ng DOTr sa Disyembre 1 ang 24/7 na libreng sakay sa EDSA Bus Carousel, na tatagal hanggang Disyembre 31.

Inaasahang mas maraming pasahero ang makikinabang sa programa, lalo't extended ang oras ng mga mall dahil sa papalapit na Pasko.

Kung matatandaan, mula alas-4 ng madaling-araw hanggang alas-11 ng gabi lang ang libreng sakay sa ruta, na bumabaybay mula Caloocan City hanggang Parañaque Integrated Terminal Exchange.

Ayon sa Land Transportation Franchising and Regulatory Board (LTFRB), nasa 100 bus ang inaasahang bibiyahe sa EDSA sa "graveyard shift" simula Disyembre 1.

Tumatanggap umano ng aplikasyon ang LTFRB para sa pagbibigay ng special permit para masuportahan ang 24/7 na operasyon ng bus carousel.

Ayon sa DOTr, posibleng ito na ang huling yugto ng libreng sakay sa EDSA Carousel dahil walang pondong inilaan ang gobyerno para sa programa sa susunod na taon.

Nanawagan din ang kagawaran na mabigyan muli ang aloksyon ang programa para mapalawig pa ito.