Muntinlupa centenarians, tumanggap ng tulong na P100K

Dalawang centenarian na residente ng Muntinlupa City ang tumanggap ng tig-P100,000 na tseke mula sa pamahalaang lungsod nitong Sabado, ika-10 ng Enero.

Personal na nakipagkita si Muntinlupa Mayor Ruffy Biazon sa mga benepisyaryong centenarian na sina Emilia Tan at Josefina Santiago upang ipagdiwang ang kanilang milestone.

Ang incentive ay alinsunod sa Muntinlupa City Ordinance No. 2018-147 at sa ilalim ng Republic Act 10868 o Centenarians Act of 2016.

Ibinahagi ni Biazon na si Nanay Emilia ay bedridden at may dementia, ngunit isa pa rin siyang patunay ng mahabang buhay at katatagan. Nahigitan niya ang buhay ng lima sa kanyang pitong anak.

Masaya ring ibinahagi ng alkalde na si Nanay Josefina ay may kahirapan na sa pandinig, ngunit nananatiling masigla at bibo pa rin sa pakikipagkuwentuhan.

Aniya, "Basta’t lalapit ka lang sa tenga kapag may sasabihin ka."

"Na-share pa nga niya ang kaniyang birthday wish, which is to live longer at hindi na raw maghirap pa ang lahat ng tao," dagdag ni Biazon.