Naaresto ng mga awtoridad ang lalaking nasa viral video na nakuhang nag-amok sa loob ng isang jeep.

Sa video, makikita ang sunod-sunod na suntok nito sa isang senior citizen na lalaki. Nang depensahan ng lolo ang sarili at palabasin ang suspek sa jeep, nanlaban pa ito at binanatan din ng suntok at tadyak ang isa pang pasahero.

Rinig din sa video ang pagmamakaawa ng ilang pasahero, kasabay ng iyak at takot ng mga kababaihan sa loob ng sasakyan.

"Tama na boy, tama na," sabi ng isang lalaking pasahero.

Nahaharap ngayon sa kasong physical injury ang suspek matapos itong maaresto ng Muntinlupa City Police.

Ayon naman kay Muntinlupa Mayor Ruffy Biazon, tila karaniwan na ang mga ganitong eksena sa naturang lugar sa pagitan ng mga pulubi at ilang pasahero.

“Ang nakuha ko lang nga e sumakay nga doon sa passenger jeep at 'yung typical na nanghihingi, nanghaharass pag 'di mo nabigyan. I think it escalated doon kasi high on substance, substance abuse,” saad ng alkalde.

“In the past, sila ay ma-aaprehend pero there is not much na magamit para sila ay ma-contain. Usually, nababalik lang sa community, so community work ang paiigtingin namin ngayon,” dagdag pa niya.