Amnestiya sa hindi nabayarang PhilHealth kontribusyon, iniutos ni PBBM

Nagbigay ng amnestiya si Pangulong Ferdinand “Bongbong” Marcos Jr. sa mga negosyante, pribadong employer, at mga self-employed na miyembro ng Philippine Health Insurance Corp. (PhilHealth) para sa pagbabayad ng kanilang hindi nabayarang kontribusyon nang walang kaakibat na interes ngayong taon.

Sa kanyang anunsyo, sinabi ng Pangulo na batid niya ang bigat ng tatlong percent na interes na ipinapataw sa mga hindi nabayarang kontribusyon sa PhilHealth. Dahil dito, inatasan niya ang ahensya na magpatupad ng isang beses na waiver ng interes para sa mga miyembrong may pagkakautang.

Saklaw ng amnestiya ang mga hindi nabayarang kontribusyon mula 2013 hanggang 2024, at inaasahang makikinabang dito ang mahigit 300,000 miyembro ng PhilHealth.

Kasabay nito, hinikayat ng Pangulo ang mga employer na i-update ang kanilang mga rekord at tiyaking rehistrado ang lahat ng empleyado sa Yaman ng Kalusugan o YAKAP Program ng PhilHealth.