Habambuhay na pagkabilanggo ang ipinataw sa tinaguriang pork barrel queen na si Janet Lim Napoles matapos hatulan ng Sandiganbayan Special Third Division ng reclusion perpetua, o hanggang 80 taong pagkakabilanggo, dahil sa dalawang bilang ng malversation of public funds.

Ang kaso ay may kinalaman sa maling paggamit ng Priority Development Assistance Fund (PDAF).

Sa 165-pahinang desisyon ng Sandiganbayan, napatunayang guilty si Napoles at lima pang iba sa paglustay ng pampublikong pondo mula sa PDAF ng yumaong Benguet Rep. Samuel Dangwa, na nagkakahalaga ng P19 milyon.

Ibinasura naman ang kaso laban kay Dangwa at tatlo pang iba dahil sila ay pumanaw na.