Kim Sae-ron, natagpuang wala nang buhay sa tahanan sa Seoul, South Korea

Natagpuang wala nang buhay sa kanyang tahanan ang aktres na si Kim Sae-ron noong Linggo, ika-16 ng Pebrero.

Ang 24-anyos na aktres ay natagpuan sa kanyang tahanan sa Seongsu-dong sa Seoul ng kanyang kaibigan na dapat sana’y makikipagkita sa kanya.

Ayon sa pulisya, wala namang nakitang foul play sa insidente, ngunit patuloy pa rin nilang iimbestigahan ang pagkamatay ng aktres.

Noong 2022, matatandaang nahuli siya sa pagmamaneho dahil nasa ilalim siya ng impluwensya ng alak matapos mabangga ang kanyang sasakyan sa isang guardrail. Pinagmulta siya ng 20 million won dahil sa insidente.

Si Kim ay nagsimula bilang child actress at kinilala bilang isa sa mga promising young actresses ng bansa. Nakasama siya sa mga pelikulang "The Man from Nowhere" at "The Neighbors." Lumabas din siya sa ilang serye tulad ng "Hi! School Love On," "Can You Hear My Heart," at "The Queen's Classroom."