Binigyang-diin ng Department of Labor and Employment (DOLE) kahalagahan ng paglikha ng mas maraming trabaho na maaaring ibigay sa mga manggagawang Pilipino.

Kasunod sa posibilidad ng pagtaas ng minimum wage ng bawat manggagawa sa mga pribadong sektor, gusto rin ng Kagawaran na mas magpokus sa pagbibigay ng mga oportunidad lalo na sa mga wala pang trabaho, ayon kay Secretary Bienvenido Laguesma.

Dagdag pa niya, ito ang kanilang dapat na gampanan na mandato at nais din nilang makapagbigay ng mga dekalidad na trabaho para sa mga Pilipino.

Ipinaliwanag ng kalihim na ang kanilang pagbibigay-pansin dito ay hindi lamang makakatulong sa bansa, kundi pati na rin sa mga unang beses pa lamang papasok ng trabaho.

Naniniwala sila na ang pagbibigay ng maraming trabaho ay mas makakapagbukas pa ng maraming oportunidad lalo na sa mga baguhan.