LTFRB kikilos laban sa prangkisa ng sira-sirang jeep

Bumabalangkas na ang Land Transportation Franchising and Regulatory Board (LTFRB) ng panuntunan na magtatakda sa pagtigil ng pagrerenew ng prangkisa ng mga pampublikong sasakyang hindi na maayos ang kondisyon.

Ayon kay LTFRB Chairperson Vigor Mendoza, kapag tuluyan nang naisapinal ang nasabing panuntunan, hindi na irerenew ang prangkisa ng mga pampasaherong sasakyang sira-sira at hindi na ligtas gamitin.

Saklaw ng patakarang ito ang mga tradisyunal at modernong jeepney, mga bus, pati na rin ang mga taxi.

Ibinahagi ni Mendoza na personal niyang naranasan ang pagsakay sa isang jeepney sa Visayas na may malaking butas sa gitna. Dagdag pa niya, may mga tsuper din umanong hindi nakasuot ng angkop na kasuotan, tulad ng pagsusuot ng tsinelas, sando, at shorts habang nagmamaneho.