‘Holdaper na pa-victim,’ sabi ni Hontiveros tungkol sa mga Discaya

Tinawag ni Senator Risa Hontiveros na mga “holdaper na pa-victim” ang mag-asawang Curlee at Sarah Discaya matapos igiit ng mga ito na sila umano ang “nanakawan” sa kanilang naging trabaho bilang government contractors sa flood control projects.

Ang pahayag ng senador ay tugon sa naging pahayag ni Curlee Discaya sa pagdinig ng Senado noong 19 Enero 2026, kung saan sinabi niyang siya at ang asawa ang dehado sa transaksiyon, lalo na sa usapin ng posibleng restitution o pagbabalik ng pondo ng bayan bilang kondisyon sa kanilang pagpasok sa Witness Protection Program (WPP).

Ayon kay Hontiveros, imbes na sumagot nang malinaw, patuloy umanong iniiwasan ng mag-asawa ang mahahalagang tanong at inililihis ang direksiyon ng pagdinig ng Senate Blue Ribbon Committee.

“Hello, sasabihin niya na ninakawan sila? Parang hinoldap tayo tapos tayo pa ang kailangang mag-sorry sa holdaper,” pahayag ni Hontiveros sa Kapihan sa Senado nitong 21 Enero 2026.

Binigyang-diin ng senador na kung tunay na nais ng mag-asawang Discaya na mapasailalim sa WPP, kailangan nilang makipagtulungan nang buo sa imbestigasyon, sa halip na ilarawan ang sarili bilang inosente o biktima.

“Tigilan na yung mga holdaper pretending to be the victim,” ani Hontiveros.