Pinawalang-sala ng Manila Regional Trial Court (RTC) Branch 15 ang dating Negros Oriental congressman na si Arnolfo Teves Jr. sa kasong murder kaugnay ng pagpaslang sa isang provincial official sa Dumaguete City noong 2019.

Sa desisyong inilabas sa publiko noong Biyernes at may petsang 05 January 2026, pinagbigyan ng korte ang demurrer to evidence na inihain ni Teves at ng kanyang mga kasamang akusado na sina Richard Cuadra at Rolando Pinili, dahil sa kakulangan ng ebidensyang magpapatunay ng kanilang pagkakasala nang lampas sa makatuwirang pagdududa.

Kasama ring kinasuhan sa kaso sina Hannah Mae Sumerano, Jasper Tanasan, at Alex Mayagma, kaugnay ng pagpaslang noong 25 March 2019.

Ayon sa korte, bigong patunayan ng prosekusyon ang sinasabing sabwatan ng mga akusado at wala ring malinaw na ebidensyang direktang nag-uugnay sa kanila sa krimen. Ang demurrer to evidence ay isang legal na mosyon na humihiling ng pagbasura ng kaso matapos ilahad ng prosekusyon ang ebidensya nito, kung ito ay itinuturing na hindi sapat para sa hatol na pagkakasala.

Matapos ang desisyon, iginiit ng abogado ni Teves na si Ferdinand Topacio na bahagi lamang umano ang kaso ng isang mas malawak na political harassment laban sa kanyang kliyente.

“The acquittal of former Congressman Arnolfo Teves of the crime of murder by the Regional Trial Court, Branch 15 of Manila is a vivid demonstration that the cases filed against Mr. Teves are nothing but harassment suits meant to persecute a political opponent,” ayon kay Topacio.

Inakusahan din niya ang Department of Justice (DOJ) na ginagamit umano laban sa mga kritiko ng pamahalaan.

“It shows how the Department of Justice has been weaponized for the purpose of vexing the critics of government. We are fortunate, however, to have found a fair and impartial tribunal that has proven itself truly independent and impervious to political pressures,” dagdag niya.

Sinabi rin ng abogado na ipagpapatuloy nila ang depensa ni Teves sa iba pang mga kasong kinahaharap nito.

“There are many more battles left to fight for truth and justice. In this, we shall never waver until the last of these groundless suits are dismissed. For indeed, the wheels of justice grind slowly, but they grind exceedingly fine,” pahayag ni Topacio.

Wala pang inilalabas na pahayag ang DOJ kung iaapela nito ang desisyon ng korte. Patuloy pa ring humaharap si Teves sa iba pang kasong kriminal sa magkakahiwalay na hukuman.