UAE sasagot sa lahat ng gastos ng higit 20,000 stranded na pasahero

Ipinatupad ng United Arab Emirates (UAE) ang emergency aviation support plans upang sagutin ang lahat ng gastos sa tirahan, pagkain, at rebooking para sa mahigit 20,200 pasahero na stranded dahil sa abala sa flight dulot ng digmaan sa pagitan ng Iran, Estados Unidos, at Israel, ayon sa anunsyo ng General Civil Aviation Authority (GCAA).

Na-reschedule o naantala ang mga flight sa pangunahing paliparan gaya ng Dubai International Airport, Abu Dhabi’s Zayed International Airport, at Sharjah International Airport kasunod ng pansamantalang pagsasara ng airspace at mga hakbang sa kaligtasan. Sinabi ng pamahalaan ng UAE na layunin ng inisyatibong ito na protektahan ang mga biyahero laban sa hindi kinakailangang kahirapan at tiyakin ang kapakanan ng pasahero sa gitna ng krisis.

Sa ilalim ng plano, sasagutin ng UAE ang gastos sa tirahan at pamamalagi ng mga apektadong pasahero, kabilang ang pansamantalang hotel, pagkain, at refreshments. Pinapadali ng mga national carrier at airport authorities ang proseso ng rebooking at pag-aasikaso ng mga regulasyon sa magkakaugnay na logistics sa airport terminals. Tinitiyak din ang kaligtasan at kaginhawaan ng mga transit passengers sa pamamagitan ng maayos na accomodation at transportasyon.

Nag-utos ang Department of Culture and Tourism sa Abu Dhabi sa mga hotel na pahabain ang pamamalagi ng mga bisitang hindi makabiyahe dahil sa cancellations, at kinumpirma na sasagutin ng estado ang mga dagdag na gabing ito. “Sa kasalukuyang sitwasyon at dahil may ilang bisita na nakarating na sa kanilang checkout date ngunit hindi makabiyahe sa kadahilanang wala sa kanilang kontrol, hinihiling namin na pahabain ang kanilang pamamalagi hanggang makaalis sila. Sagutin ng DCT Abu Dhabi ang gastos sa dagdag na pamamalagi,” ayon sa circular.

Pinayuhan ng mga awtoridad ang mga apektadong pasahero na direktang kontakin ang kanilang airline para sa updates sa rebooking o refund options, gamitin ang opisyal na apps ng airport o airline para sa impormasyon ng schedule, at itago ang mga resibo sa pagkain at tirahan kung sila ay nagbayad mula sa sariling bulsa, dahil posibleng ma-reimburse.

Nag-ambag din ang mga pribadong kumpanya sa pamamagitan ng libreng accommodations. Nagbukas ang Arabnb Homes at Danube Properties, kasama ang iba, ng mga apartment para sa stranded na biyahero, na inuuna ang mga pamilya na may mga bata at matatanda.

Ayon sa GCAA, nakikipag-coordinate ang mga paliparan at national carrier ng UAE upang maayos ang daloy ng operasyon, kabilang ang rerouting ng ilang flights, pagpapabilis ng rescheduling, at pagpapalakas ng on-ground coordination sa passenger terminals upang maiwasan ang congestion. Pinapayuhan ang mga pasahero na sundan ang opisyal na updates sa pamamagitan ng aprubadong channels.