Abante: Pag-anunsyo ni Sara ng kandidatura sa 2028 nagbukas ng ‘Pandora’s box’

Ang maagang pahayag ni Vice President Sara Duterte sa kanyang kandidatura sa 2028 national elections ay nagbukas ng “Pandora’s box” ng seryosong mga alegasyon na kailangan niyang sagutin, ayon kay Manila 6th District Rep. Bienvenido “Benny” Abante Jr.

Ani Abante, ayaw niyang “pre-empt kung ano ang intensyon ng bise presidente,” ngunit kinuwestiyon niya ang timing ng anunsyo, lalo na’t may tatlong impeachment complaints na ang nakabinbin laban kay Duterte noon.

“Napakaaga ng kanyang announcement,” paliwanag ni Abante, na binanggit na may dalawang buong taon pa bago ang 2028 national elections.

Para sa beteranong mambabatas, ang pahayag ni Duterte ay hindi nakapapatigil sa kontrobersiya; sa halip, maaari nitong ilantad ang mga isyu sa publiko.

“Her announcement would open the Pandora’s box for everything. That will expose her publicly,” dagdag niya, bilang chairman ng House Committee on Human Rights.

Ani Abante, ang bagong sitwasyon ay naglalagay sa VP ng tungkulin na sagutin ang mga katanungang ibinato laban sa kanya, habang tinitimbang ng publiko kung anong klase ng pamumuno at direksyon ang maibibigay niya.

Sinabi niya na nasa VP ang responsibilidad na ipaliwanag ang mga isyu sa sambayanang Pilipino.

Ibinunyag ni Duterte ang kanyang hangarin sa pagkapangulo noong Miyerkules ng umaga, 18 Pebrero. Sa gabing iyon, sa House of Representatives, inendorso ni Abante at Deputy Speaker at La Union 1st District Rep. Paolo Ortega V ang ika-apat na impeachment complaint laban sa Bise Presidente.

Ang nag-iisang nagreklamo ay si Atty. Nathaniel Cabrera. Ani Abante, ang kanyang desisyon na i-endorso ang reklamo ay walang kinalaman sa 2028 presidential race.

“This is about 2026, about whether the Vice President remains fit to hold the second highest office in the land. This is not about politics; this is about accountability and integrity,” ani Abante.

Aniya, ang proseso ng impeachment ay nagbibigay kay Duterte ng pagkakataon na harapin ang mga akusasyon nang diretso. “After all, the public deserves clarity on issues tied to the Office of the Vice President (OVP).”

Dagdag pa niya, kung walang mali si Duterte, wala ring magiging epekto ang impeachment complaint. Ngunit kung mapapatunayan ang paglabag, ito ay magpapatuloy sa impeachment court.