Makikita ng mga konsyumer ng kuryente ang bagong singil sa kanilang bills simula Enero, matapos aprubahan ng Energy Regulatory Commission (ERC) ang koleksyon ng Green Energy Auction Allowance (GEA-All) sa halagang P0.0371 kada kilowatt-hour.

Sa isang media briefing noong Biyernes, kinumpirma ni ERC chairperson at CEO Francis Saturnino C. Juan ang pagtaas ng presyo.

Ayon sa kanya, ang bayad na ito “ay sisingilin sa lahat ng on-grid end-users upang pondohan ang diperensiyal na halaga na kailangan para ganap na bayaran ang lahat ng GEA eligible plants.”

Makikita ito bilang hiwalay na item sa bill, na kokolektahin ng Distribution Utilities, Retail Electricity Suppliers, o National Grid Corporation, depende sa uri ng kustomer.

Ang lahat ng nakolektang pondo ay dapat isumite sa TransCo-managed GEA-All Fund bago sumapit ang ika-15 ng susunod na buwan. Inutos din ng ERC sa mga kumpanya ng kuryente na gawing available ang kanilang mga rekord para sa agarang audit upang matiyak ang transparency.