Bigo ang isang lola na makamit ang korona ng Miss Universe Korea na nakuha ng 22-anyos na kalahok.

Hindi man nanalo sa pagandahan ang 81-anyos na si Choi Soon Hwa, nakuha niya ang Best Dressed award sa coronation night na ginanap noong Lunes sa Seoul, South Korea.

Sa 32 kandidatang lumahok sa patimpalak, si Choi ang pinakamatandang contestant.

Si Han Ariel, isang 22-anyos na estudyante ng fashion school and kinoronahang Miss Universe Korea 2024. Siya ang kakatawan sa South Korea sa Miss Universe pageant sa Nobyembre sa Mexico.

Si Choi ay isang dating manggagawa sa ospital na naging modelo nang siya ay nasa edad 70 pataas, ayon sa ulat ng BBC. Siya ay naging matagumpay na modelo sa South Korea at lumakad pa sa runway sa kanilang fashion week.

Sumali si Choi sa Miss Universe Korea sa pag-asang magkaroon ng pandaigdigang karera sa pagmomodelo.

“Ang makasali lamang ay isang kamangha-mangha at marangal na karanasan,” sinabi niya sa BBC tungkol sa kanyang karanasan sa pagsali sa Miss Universe Korea.

Ibinahagi din ni Choi na sinuportahan siya ng mga kalahok sa pageant.

“Nagulat ang mga kalahok na makita ako, at nang malaman nila na 80 na ako. Nagpahayag sila ng paghanga, sabi, gusto kong tumanda tulad mo,” sabi niya.

Ang kanyang mga apo, na nasa edad 20 pataas ay nagpahayag din ng kanilang paghanga sa kanya.

“Ang aking mga apo ay nagpapasaya sa akin, na nagsasabi, ‘Ang aming lola ay napaka-cool, maganda, maganda, at ang pinakamahusay!’” sabi niya.

Umaasa si Choi na mas maraming senior ang makakalahok sa mga beauty competition at hamunin ang status quo.

“Habang dumarami ang nakikilahok na mga nakatatanda, ang mga pananaw sa kanila ay magbabago, at darating ang panahon na ang mga nakatatanda ay maaaring makipagkumpetensya sa mga kompetisyon sa mundo,” sabi niya sa ulat. “Ngunit sa ngayon, oras pa para sa mga kabataan na umakyat sa entablado.”

Sa mga nakalipas na taon, inalis ng Miss Universe Organization ang limitasyon sa edad para sa mga kandidato, at binuksan ang kompetisyon sa mga may-asawa, ina at transgender.