Patuloy na binabantayan ni Pangulong Ferdinand R. Marcos Jr. ang lagay ng panahon sa ilang bahagi ng bansa na apektado ng Bagyong Inday, ayon sa isang opisyal ng Palasyo nitong Huwebes.

Ayon sa PAGASA, alas-3 ng hapon nitong Huwebes, ang sentro ng mata ng Bagyong "Inday" ay tinatayang nasa 940 kilometro sa silangan ng Hilagang Luzon. Taglay nito ang pinakamalakas na hanging umaabot sa 175 km/h malapit sa gitna at pagbugsong hanggang 215 km/h.

Kumikilos ito pakanluran-hilagang-kanluran sa bilis na 20 km/h. Samantala, patuloy na nakaaapekto ang Habagat sa Palawan, Visayas, at Mindanao.

Ayon kay Palace Press Officer at Presidential Communications Office Undersecretary Claire Castro, hiniling na ng Metropolitan Manila Development Authority (MMDA) sa mga shopping mall na pansamantalang buksan ang kanilang mga parking area para sa magdamagang paradahan sakaling lumala ang lagay ng panahon.