Hindi naman pwedeng ikaila na nakakahaba ng buhok at mas lalo pang naging pagkaganda-ganda ni Janine Gutierrez dahil nga ang deskripsyon ni Jericho Rosales na manliligaw niya sa kasalukuyan ay: “She’s an amazing person. Very sweet, very kind, very funny and very dedicated. And you know, good actress. And we just like, you know, share a lot of things.”

In full English-ero mode na naman si ginoong Rosales sa kanyang pahayag na may kasama pang twinkle sa kanyang mata at hindi maitagong kilig para sa kanyang kapareha sa “Lavender Fields” kung saan ang pangunahing bidang babae ay si Jodi Sta. Maria.

Kontrabida si Janine sa bagong drama kung saan ang kanyang katauhan ay asawa ni Rosales at si Jodi naman ay babaeng hindi sinasadya ang kanilang pagtatagpo at ang katauhan ni Jericho ay agarang minahal. Tamang pagmamahalan sa maling pagkakataon at panahon ang dramarama ng mga katauhang binibigyang buhay nila.

Tamang-tama naman ang mga ipinahayag ni Janine patungkol sa mga sinabi ni Echo: “Yeah, it’s been fun getting to know him and hanging out with him outside of work. Masaya naman.” Mapapanood ang pahayag niyang ito sa isang bidyo na ang naglapag ay ang number one content provider sa bansa.

Sa mga papuri ni ginoong Echo sa dalagang may hinhin na tangi at dakilang ganda, ang reaksyon ni Gutierrez ay: “That’s sweet to hear.”

Isa pang chika na hindi mapigilang matawa ni Janine ay ang katotohanan na nakipagtagpo na pala sa kanyang mga magulang ang mabunying aktor at tila ang mommy dearest niyang si Lotlot ay may pagsang-ayon at walang pag-aalinlangan sa pagkamamabutihan niya rito.

“Eh, di masaya,” iyan ang opisyal na tugon ni Janine sa kaganapan.

Wasto na ang pag-iisip, nasa tamang idad na ang dalawang artistang ito na ipinaalam sa lahat ang kanilang estado na unti-unti kinikilala ang isa’t isa at may mga pagkakataong lumalabas na hindi dahil sila ay magkatrabaho kundi dahil may tunay silang interest na higit pa sa pagiging mga artista.

Ang pinagtataka lang ng mga pangkat katkatera, napala-kombyente naman na ang pag-amin ay nagkataon na nangyari ngayong meron silang bagong palatuntunan na inilalako at malapit na itanghal.

Hindi tuloy maalis sa mga kasapi sa pangkat katkatera na “gumigimik” ang dalawa para mas lalong maging mausisa at subaybayan ang “Lavander Fields.”

Kayo mga Chika Diva mambabasa, bukal at sinsero nga ba na maligaya si Janine Gutierrez sa panunuyong ito ni Jericho Rosales o ito’y isang pangmalakasang paandar at payanig lamang?

At higit sa lahat, lilinaw ba ang tubig sa ilog Pasig dahil sa pagkakamabutihang ito? Ay! Ang savage ng tanong! Hahahaha!

***

Ang mga namumuno sa pelikula nina Joshua Garcia at Julia Barretto, sabi nga ay “laughing their way to the bank” at hindi sila unhappy kasi palong-palo sa takilya ang pelikulang “Un/Happy For You.”

Matapos ang sangrekwang flops, naka-tsamba ang dalawang bida sa kanilang pelikula na ayon sa isang social media pahayag, sa unang araw nito sa mga sinehan ay P20.5 milyon ang kinita nito. Ay! Parang handang-handa na agad ang hiwangsay, huh! May numero pang nakasaad kaya paano mo naman pagduduhan, hindi ba naman?

Ngayong siksik, liglig at umaapaw ang kita nito sa takilya, nakakatuwang kaganapan ito para sa estado ng pelikulang Pilipino. Ang saya naman, hindi ba?