Maris Racal ‘marupok’!

“Best performance of her life.” Iyan ang turing at pakiwari ng balana, dabarkads at madlang pipol sa emosyonal at sosyaling pagluha ni Maris Racal . Ang dahilan sa kanyang emotional outburst at pagsasalita in perfect kolehiyala English, hiwalay na sila ng boyfriend na si Rico Blanco. Matapos ang limang taong relasyon, hiwalay na ang kanilang dekolor at puti! At may tandang pandamdam na nga ang lahat-lahat sa kanilang dalawa.

Pahayag ni Racal na very Irene Tiu sa “Can’t Buy Me Love“ ang pagbikas sa mga salita: “Rico and I are over.”

Pandagdag dalamhati at drama sa kanyang mga pangungusap ang paglagaslas ng mga luha niya at pag-amin niyang may takot siyangt nararamdaman sa kanyang dibdib. Ayaw niya dapat bigyang tugon ang mga tanong tungkol kay ginoong Blanco dahil sa oras daw na ianunsyo niya ito, ibig sabihin ay talagang tapos na sila ng Rivermaya vocalist.

Sabi pa ni Racal: “Ilang linggo pa lang ang nakalipas since the break-up kaya hindi ko pa kayang iditalye pa ang dahilan ng hiwalayan, you know. May changes akong pinagdadaanan sa ngayon at I told him about it.”

“I told Rico my problems, my issues sa buhay and he took it like a man,” patuloy na pahayag ni Maris. “It was a difficult talk coz I really love him so much. I love him and he loves me but I have so many questions about my life. How will I go on sa buhay with him when I have so many questions about me.”

Aniya pa: “It was so difficult talk but it’s a very polite separation. Up to the very end of the relationship, it was still full of love, full of understanding and Rico is one of a kind. If only I could skip through my 20s you know, but I can’t. I have to face it, I have to sit with my feelings and acknowledge my changes.”

Paglilinaw ni Racal, walang kinalaman ang ka-love team niyang si Anthony Jennings sa break-up.

Sa social media, partikular na sa X, maliban sa pagiging trending topic ng hiwalayan nina Racal at Rico, hating-hati ang opinyon. May mga nagsasabing awang-awa sila kay Maris, nauunawaan at nararamdaman nila ang pinagdaraanan niyang sakit at pighati.

May nagpapahayag rin na isang malaking gimik ang hiwalayan lalo na nga’t may pelikula sa kasalukuyan ang aktres na ipinapalabas sa mga sinehan, ang “Marupok AF.”

Tiyak marami ang magiging mausisa sa pelikulang hindi na sila-sila ang manonood kasi nga palong-palo ang hiwalayang paandar. Bagay nga kay Maris ang pamagat ng pelijula niya, marupok ang kanilang relasyon na kay dali-dali palang bitawan.

Maramii-rami ang nag-look na lang sa sky at walang pananalig na walang kinalalaman ang katambal nitong si Anthony Jennings sa hiwalayan. Sa ngayon, hindi siya ang dahilan. Pag malapit na ipalabas ang pelikulang ilulunsad sila bilang mga pangunahing bituin, siguradong ang non-showbiz girlfriend naman ni Jennings ang luluha at ibabandera na ang katotohanan at pawang katotohanan lamang. Kaya, kaabang-abang ang plot at character development, hindi ba naman?

Kay Maris Racal, yakap na mahigpit ang aming inihahatid para sa iyo.