Prince at Princess of Wales, bumida sa Scotland

Naghatid ng sigla at ngiti ang Prince at Princess of Wales sa kanilang pagbisita sa Scotland, kung saan tampok ang sports, sining, at mga komunidad sa Stirling at Falkirk.

Bilang Duke at Duchess of Rothesay sa Scotland, sinimulan nina Prince William at Catherine ang kanilang biyahe sa The Kelpies—ang dambuhalang eskulturang bakal na sumasalamin sa mitolohiya at husay ng Scottish craftsmanship. Ibinahagi ng mag-asawa sa social media ang kanilang karanasan habang inaalam ang kasaysayan at kahalagahan ng mga likhang-sining.

Isa sa mga pinakatampok na bahagi ng pagbisita ang pagtungo nila sa National Curling Academy sa Stirling, kung saan nakipagkita sila sa Team GB at Paralympics GB Curling teams bago ang Winter Olympic at Paralympic Games sa Milano-Cortina. Dito, ipinamalas ni Catherine ang kanyang masigla at competitive na personalidad matapos talunin si William sa isang friendly curling match.

Makikita sa mga larawan ang masayang pag-cheer ng Princess, pakikipag-high-five sa mga atleta, at pagdiriwang ng matagumpay na tira sa yelo. Sumubok din si William sa sport sa tulong ng mga propesyonal na curler, habang binati ng mag-asawa ang mga lokal na nagtipon upang sila’y makita.

Nagbigay-pugay rin si Catherine sa kulturang Scottish sa pamamagitan ng kanyang kasuotan—isang bespoke blue tartan coat na gawa mula sa telang hinabi ng Johnstons of Elgin, isang heritage brand ng Scotland. Isinuot din niya ang kanyang sapphire at diamond earrings at iconic engagement ring na may sentimental na halaga.

Bumisita rin ang mag-asawa sa Radical Weavers, isang handweaving studio at charity sa Stirling na gumagamit ng tradisyunal na tartan weaving upang labanan ang social isolation at suportahan ang mental health ng komunidad.

Habang abala sina William at Catherine sa Scotland, si Prince Harry naman ay nasa London para sa pagdinig sa korte. Hindi inaasahang magkikita ang magkapatid sa kanyang pagbisita sa UK, at hindi rin siya inaasahang makikita si King Charles, na kasalukuyan ding nasa Scotland.