Maaaring mas humaba ang suspensyon ni Dasmariñas City Representative Francisco “Kiko” Barzaga bilang miyembro ng House of Representatives kung may isa pang ethics complaint na isusumite laban sa kanya para sa mga aksyon niya pagkatapos ng naunang suspensyon.

“Kung hindi ako nagkakamali, hanggang sa unang linggo ng Pebrero ang suspensyon... Pero sa tingin ko, dahil na-serve na ito, kakailanganin ng isa pang complaint, kasi na-serve na. Ito yung parusa dun sa nauna niyang aksyon e,” ani Tingog Party-list Representative Jude Acidre, chairman ng House Committee on Higher and Technical Education, noong Sabado, 17 Enero 2026, sa isang News Format sa Dapo restaurant sa Quezon City.

Ayon kay Acidre, ang kasalukuyang parusa ni Barzaga ay nakatali sa mga naunang aksyon, ngunit ang mga kilos niya pagkatapos nito ay maaaring maging hiwalay na usapin na haharapin ng Kamara sa pamamagitan ng bagong reklamo.

Kung susuriin ng House ang mga naging pag-uugali ni Barzaga matapos ang unang kaso, maaaring magkaroon ng isa pang round ng proceedings na magpapatagal sa suspensyon.

Lumabas ang posibilidad ng pangalawang reklamo matapos sabihing dapat mas matinding parusa ang harapin ni Barzaga ni Deputy Speaker Ronaldo Puno, chairman ng National Unity Party (NUP), at iminungkahi rin ang posibleng pagpapatalsik sa kanya mula sa Kamara.