Natuklasan ang bagong natural gas reservoir sa Malampaya East 1 (MAE-1), mga limang kilometro lamang sa silangan ng umiiral na Malampaya Field sa offshore Palawan, ayon sa ulat noong Lunes, 19 Enero 2026.

Tinatayang may 98 bilyong cubic feet ng natural gas ang reservoir, kasama ang condensate, isang high-value liquid fuel. Sa paunang pagsusuri, ang well ay nakapagdala ng 60 milyong cubic feet kada araw, na posibleng maging mas produktibo kumpara sa mga naunang Malampaya wells.

Ayon sa mga eksperto, maaaring magbigay ang gas mula MAE-1 ng kuryente na katumbas ng halos 14 bilyong kilowatt hours sa loob ng isang taon—sapat para sa mahigit 5.7 milyong kabahayan, 9,500 gusali, o halos 200,000 paaralan.

Ang MAE-1 ang kauna-unahang milestone sa Malampaya Phase 4 drilling campaign, na kasama rin ang Camago-2 at Bagong Pag-asa wells. Susunod na hakbang ang pagtatapos at pagsusuri sa Camago-3 well, kasunod ng Pag-asa Exploration well para matukoy ang karagdagang gas resources.

Isinagawa ang drilling ng SC-38 Consortium, pinangunahan ng Prime Energy, kasama ang UC-38, PNOC Exploration Corporation, at Prime Oil and Gas Incorporated. Walang major incident na naiulat sa operasyon.

Ayon sa mga awtoridad, puwede itong makatulong sa mas matatag na suplay ng kuryente at dagdagan ang domestic gas resources sa mga susunod na taon.