Bonoan, binulaan ang lokasyon ng mga flood control project

Iniuugnay si dating Department of Public Works and Highways (DPWH) Secretary Manuel Bonoan sa umano’y korapsyon sa flood control projects matapos siyang akusahan ng sinadyang pagtakip sa mga tinaguriang lokasyon ng mga ito.

Ayon kay Senate President Pro Tempore Panfilo “Ping” Lacson, pineke umano ni Bonoan ang mga lokasyon ng ilang flood control projects, kabilang ang isang proyekto sa Naujan, Oriental Mindoro. Sinabi ni Lacson na mali ang ibinigay na grid coordinates ni Bonoan, dahilan upang umabot sa mahigit 400 ang inisyal na natukoy na ghost projects.

Dagdag pa niya, matapos puntahan ng mga imbestigador ang mga lokasyong itinuro ng mga nasabing coordinates, wala silang natagpuang proyekto. Ayon kay Lacson, sinadya umanong iligaw ni Bonoan ang mga imbestigador upang pagtakpan ang mga anomalya.

Maging ang “Sumbong sa Pangulo” platform na itinayo para sa layunin ng imbestigasyon ay umano’y nalinlang din. Gayunman, hindi rin umano ito nagtagumpay matapos makahanap ang mga opisyal na imbestigador ng paper trail na nag-uugnay kay Bonoan sa mga kuwestiyonableng proyekto.

Dahil dito, naglabas ng subpoena ang Senate Blue Ribbon Committee upang ipatawag si Bonoan sa pagdinig na itinakda sa Lunes, ika-19 ng Enero 2026. Subalit ayon kay Lacson, nasa Estados Unidos pa rin si Bonoan at wala umanong ibinibigay na anumang pahiwatig o komunikasyon na siya ay babalik sa Pilipinas.

Bunga nito, inirekomenda ni Lacson ang pag-isyu ng warrant of arrest at ang pakikipagtulungan sa mga internasyonal na awtoridad upang mapauwi si Bonoan at mapanagot sa mga paratang laban sa kanya.