Ayon sa mga dokumento at larawang nakuha mula sa Department of Public Works and Highways (DPWH), ang P96.5 milyong flood control project sa Barangay Culaman, Jose Abad Santos, Davao Occidental ay hindi "ghost project." Ito ay halos tapos na, sa kabila ng mga alegasyong may kaugnayan sa graft na isinampa kaugnay ng proyekto.

Ang proyekto, na mayroong kasamang konstruksyon ng isang concrete revetment, ay ipinatupad ng DPWH Davao Occidental District Engineering Office sa ilalim ng Project ID 22LE0029. Ito ay iginawad noong 2022 sa St. Timothy Construction Corporation, na pag-aari ni contractor Cezarah “Sarah” Discaya, na inaresto kamakailan.

Batay sa mga larawang at bidyong nakuha mula sa DPWH District Office, may mga bahagi ng proyekto na tapos na, habang ang iba ay patuloy pang ginagawa.

Si Discaya, kasama sina District Engineer Rodrigo C. Larete, Assistant District Engineer Michael P. Awa, ilang section chief, project engineer, at inspector, gayundin si Ma. Roma Angelin Rimando ng St. Timothy Construction Corporation, ay kinasuhan ng alegasyon na nagsabwatan umano sila sa pagpapalabas ng pondo para sa isang revetment project na sinasabing hindi naipatupad.

Ang mga kaso ay nakabatay sa umano’y paglabag sa Section 3(e) ng Republic Act No. 3019 o Anti-Graft and Corrupt Practices Act, at sa Articles 217, 171, at 172 ng Revised Penal Code na may kinalaman sa malversation ng pondo ng bayan at falsification ng mga pampublikong dokumento.

Walong opisyal ng DPWH na sangkot sa kaso ang isinailalim sa anim na buwang preventive suspension habang dinidinig ang kanilang mga kasong administratibo. Ang suspension order ay ipinalabas matapos ang inspeksiyon sa proyekto na isinagawa ni DPWH Secretary Vince Dizon.

Batay naman sa hiwalay na inspection reports ng DPWH, ang flood control project ay sumailalim din sa repair works matapos masira ang ilang bahagi nito dahil sa matinding pagbaha noong Nobyembre 2022.

Kasama sa mga ulat ang drone footage na nagpapakita ng aktuwal na kalagayan ng proyekto mula sa himpapawid. Ipinapakita ng mga dokumento na ang mga nasirang bahagi ay inayos ng kontratista bilang bahagi ng warranty, nang walang karagdagang gastos sa pamahalaan.

“Ito ay sumailalim sa pagkukumpuni matapos ang matinding pagbaha noong Nobyembre 2022, at isinagawa ang mga kinakailangang repair bilang warranty alinsunod sa umiiral na batas,” ayon sa isang source.

Dagdag ng source, ang mga dokumentong ito ay ihahain sa korte para sa pagsusuri bilang bahagi ng proseso ng pagdinig sa mga kasong isinampa kaugnay ng proyekto.