Ayon kay Assistant Ombudsman Mico Clavano, mahalagang makuha kaagad ang mga gadget na pag-aari ng yumaong dating Department of Public Works and Highways (DPWH) undersecretary na si Catalina Cabral upang mapreserba ang mga posibleng ebidensiya kaugnay ng imbestigasyon sa mga umano’y anomalya sa flood control projects.

Sa isang press conference nitong Biyernes, 19 Disyembre 2025, sinabi ni Clavano na minamadali ng mga imbestigador ang pagkuha ng mga electronic device ni Cabral upang masuri ang kanyang mga huling komunikasyon at matukoy kung may kaugnayan ang mga ito sa kasalukuyang imbestigasyon.

“Ang dahilan para rito ay halata naman dahil nais naming malaman kung sinu-sino ang mga taong kanyang nakausap bago nangyari ito, at upang makita kung mayroong kahit ano na may kinalaman sa aming imbestigasyon sa flood control,” sabi ni Clavano en Ingles.

Dagdag pa ng assistant ombudsman, isang mahalagang pigura sa kaso si Cabral, lalo na’t dati siyang DPWH undersecretary na may hawak na sensitibong impormasyon mula sa kanyang panunungkulan. Aniya, kailangang mapreserba ang anumang impormasyong maaaring makuha mula sa kanyang mga device.

“Marami rin kaming natanggap na impormasyon na mayroon daw siyang listahan ng mga proponents at proyekto, kaya ito ay kabilang sa aming mga paksa ng pagtatanong sa Office of the Ombudsman,” ani Clavano.

Ayon pa sa kanya, nagtungo si Cabral sa tanggapan ng Ombudsman noong 3 Disyembre, kung saan isinagawa ang paunang pagtatanong upang mailatag ang mga posibleng kasong kanyang haharapin.

Sinabi rin ni Clavano na handa ang Ombudsman na kausapin si Cabral at tiyaking magiging maayos ang proseso ng pagkuha ng impormasyon. Tinukoy niya si Cabral bilang isang mayamang pinagmumulan ng impormasyon kaugnay ng mga indibidwal na umano’y sangkot sa mga insertion sa flood control projects na kalaunan ay tinukoy bilang mga “ghost” project.

Ayon kay Clavano, ang sinasabing listahan ng mga may kaugnayan sa kaso ay hindi pa dumarating sa tanggapan ng Ombudsman. Nagbabala siya na ang anumang pagkaantala ay maaaring magpataas ng posibilidad na mabago o mabura ang digital na ebidensiya.

Sinabi rin ni Clavano na mag-aaplay ang Ombudsman ng cyber warrants upang makakuha ng legal na access sa mga computer at iba pang electronic device ni Cabral, alinsunod sa umiiral na mga legal na pamamaraan.

“Hindi namin nais manghimasok sa mga usaping pampamilya, lalo na sa panahon ng pagdadalamhati, ngunit may mga interes ang estado na kailangan naming isulong,” dagdag niya.

Dagdag pa ni Clavano, nakikiisa ang pamilya ng yumaong si Cabral at umaasa siyang magpapatuloy ang kanilang kooperasyon habang nagpapatuloy ang mataas na antas ng imbestigasyon. Nagpasalamat din siya sa pagpayag ng pamilya na isailalim sa DNA test at autopsy ang bangkay.