Lalaki, nang-hostage sa Recto

Naging tensyonado ang eksena sa bahagi ng Recto sa Lungsod ng Maynila matapos ma-hostage ang isang babae ng isang lalaking may dalang patalim, Martes ng hapon.

Ayon sa ulat, hinabol ng mga pulis ang nasabing lalaki dahil may kaso ito ng pananaksak. Sa kanyang pagtatangkang makatakas, nagtungo siya sa isang printing shop at tinutukan ng patalim ang isang babae.

Napag-alaman din na nagtungo siya sa Recto upang maningil ng kanyang sahod na nagkakahalaga ng P20,000, ngunit hindi ito ibinigay ng kanyang amo.

Hiniling ng suspek na mabayaran siya at makita ang kanyang ina. Kalaunan, ibinaba niya ang patalim at sumuko matapos ang negosasyon.

Ayon sa pulisya, naibigay na sa ina ng suspek ang P20,000.

Paliwanag ng suspek, wala siyang balak mang-hostage at napatakbo lamang siya dahil sa mga humahabol sa kanya.

Dahil dito, mahaharap ang sumukong suspek sa mga reklamong illegal detention, alarm and scandal, at illegal possession of deadly weapon.