Sen. Bato, humingi ng paumanhin kay Cendaña

Humingi ng dispensa si Senador Ronald “Bato” Dela Rosa dahil sa pangungutya niya sa pisikal na anyo ni Akbayan Party-list Representative Percival Cendaña, isang stroke survivor.

Sa isang post sa social media, humingi ng paumanhin si Dela Rosa matapos siyang umani ng iba’t ibang batikos mula sa health at medical advocates dahil sa kanyang mga nakakasakit na pahayag tungkol sa kalagayan ng kalusugan ng mambabatas.

Binitiwan ni Dela Rosa ang kanyang mga tirada laban kay Cendaña, isang matinding kritiko ni Bise Presidente Sara Duterte sa House of Representatives, na may kasamang pananakot nitong Sabado.

Nag-ugat ang kanyang pahayag sa mga komento ni Cendaña kaugnay ng impeachment laban kay VP Duterte.

Inendorso ni Cendaña ang unang impeachment complaint na inihain ng civil society organizations sa House of Representatives laban kay Duterte.

May kabuuang 215 mambabatas, o higit sa dalawang-katlo ng mga miyembro ng House of Representatives, ang sumuporta sa resolusyong i-impeach si Duterte.