Hindi nagpatalo si Philippine Coast Guard (PCG) Spokeperson for West Philippine Sea Jay Tarriela sa pahayag ni Congressman Paolo "Pulong" Duterte na huwag daw nitong "i-demonize" ang Tsina.

Rason ni Pulong, puro pasaring at media interviews si Tarriela ukol sa panggigipit ng Tsina sa Philippine navy sa pinag-aagawang teritoryo kaysa idaan ito sa diplomacy at maayos na paraan.

Nagulantang naman ang PCG official dahil mukhang dumepensa pa ang kongresista sa panig ng Tsina kaysa Pinas.

Sambit niya, "Honorable Paolo Duterte, grabe naman ang haba ng post mo, at parang may personal kang galit sa akin. Bakit ako ang kinagagalitan mo, gayong China ang nangigipit sa mga Pilipino. Parang magkakampi pa kayo — pareho kayo ng linyahan. Pro-China ka ba, Sir?."

Sumagot din si Tarriela sa akusasyon ni Pulong na baka hindi ito nag-aaral ng mabuti sa Philippine Military Academy (PMA) dahil hindi nito hinahawakan nang maayos ang isyu.

"PMA issue? Hindi ka pa ba naka-move on diyan? Kung pag-aaral ang gagawin nating sukatan, mukha namang mas maayos ang academic credentials ko ngayon kumpara sa issue mo," saad niya.

Giit din ng tagapagsalita, mayroon namang sapat na diplomatic engagements ang bansa sa Tsina at mayroon pa ngang embahada at consulate offices ito rito, tanda na nagkakaroon naman ng maayos na komunikasyon sa pagitan ng mga bansa.

Naninidigan din si Tarriela na kailanman ay hindi nito binabahiran ng masama ang imahe ng Tsina kundi sila mismo ang hindi rumirespeto sa resulta ng UNCLOS at 2016 Arbitral Award.

"Huwag kang malito: China ang may sariling interpretasyon ng mga insidente, ng UNCLOS, at ng 2016 Arbitral Award — hindi ako. Ang ginagawa ko lang ay ilahad sa publiko ang totoong nangyayari sa WPS," sabi niya.

"O baka ang gusto mo ay manahimik tayo habang hina-harass tayo ng China? Ang pananahimik sa harap ng agresyon ay hindi diplomacy — defeatist mindset iyan na wala na tayong magagawa," diin niya.

Paghihimay rin ng tagapagsalita, kung tunay na concerned daw si Pulong sa mga Pilipinong sundalo, coast guard, at mangingisda, bakit hindi raw ito nagsalita tuwing may karahasan na nangyayari.

Buwelta pa lalo ni Tarriela, pumasok na lang daw si Pulong sa Kongreso at gawin ang trabaho niya imbes na magkalat ng maling impormasyon.

"Huwag kang magkalat ng fake news, Honorable Congressman ka pa naman. Walang 10 million akong “ayuda.” Pero kumusta naman ang P51 billion na binanggit ni Usec Cabral noong nakaraang taon? Naubos na ba?" tanong nito.