Napigilan ng mga awtoridad ang umano’y planong mass shooting sa isang paaralan sa Leyte noong gabi ng Miyerkules.

Ayon kay DILG Secretary Jonvic Remulla, isang 14-anyos na Grade 10 student ng Tolosa National High School ang nagbanta ng pamamaril at pananaksak sa kanilang paaralan.

School shooting sa Tacloban, pinaghandaan ng mahigit isang buwan - PNP

Nabunyag ang plano matapos makatanggap ng impormasyon mula kay Senador Bam Aquino pasado alas-8 ng gabi, na agad namang ipinasa sa mga kinauukulang awtoridad para imbestigahan.

Batay sa salaysay ni Remulla, gumamit umano ang mag-aaral ng maraming dummy accounts sa social media upang maglabas ng mga pagbabanta. Natunton ito ng Criminal Investigation and Detection Group (CIDG), ngunit sa isinagawang pagsisiyasat ay napag-alamang wala namang akses sa baril ang bata at maging ang kanyang mga magulang.

Pinaniniwalaang maaaring naimpluwensiyahan ang mag-aaral ng kamakailang insidente ng pamamaril sa Tacloban City, dahilan upang ilarawan ng kalihim ang kaso bilang isang “copycat attempt.”