Mahigit 1,149 katao ang inilikas sa Quezon City habang nagdadala ng matitinding hangin at malalakas na pag-ulan ang Super Typhoon Uwan sa iba’t ibang bahagi ng bansa.

Ang kabuuang bilang ng mga inilikas ay katumbas ng humigit-kumulang 284 pamilya mula sa anim na barangay, batay sa anunsyo ng lokal na pamahalaan ng lungsod at ang mga ito ay pansamantalang nanunuluyan sa 8 evacuation centers.

Para sa mga emergency, maaaring tumawag ang mga residente sa Quezon City helpline: 122.

Ang mga LGU sa National Capital Region (NCR) ay naka–high alert dahil inaasahang mararamdaman ang epekto ng bagyong Uwan sa rehiyon ngayong weekend. Nakahanda na rin  ang mga response team at rescue equipment para sa posibleng agarang deployment sa oras ng emergency.

Mas maaga ngayong araw, inihayag ng Malacañang ang suspensyon ng trabaho sa gobyerno sa siyam na rehiyon sa Nobyembre 10, at klase sa labindalawang rehiyon sa Nobyembre 10 hanggang 11, dahil sa epekto ng bagyo.

Batay sa 11 a.m. cyclone bulletin ng PAGASA, ang Metro Manila ay nananatiling nasa ilalim ng Signal No. 3.

Huling namataan si Uwan sa baybaying bahagi ng Pandan, Catanduanes, taglay ang pinakamalakas na hanging 185 km/h malapit sa gitna at bugsong hangin na umaabot sa 230 km/h, habang kumikilos ito pakanluran–hilagang kanluran sa bilis na 30 km/h.