Patuloy ang effusive eruption at minor strombolian activity ng Bulkang Mayon, ayon sa ulat ng Philippine Institute of Volcanology and Seismology (PHIVOLCS).

Ayon kay Mariton Bornas, Chief ng Monitoring and Eruption Prediction Division ng PHIVOLCS, tuluy-tuloy ang pagdaloy ng lava mula sa bunganga ng bulkan. Nagdudulot ito ng pyroclastic density currents at pagguho ng mga bato sa itaas na bahagi ng bulkan.

Ipinaliwanag niya na ang minor strombolian events ay nangyayari kapag pumuputok ang mga bula ng volcanic gas sa loob ng lava, na nagreresulta sa pagtilamsik o lava spray.

Patuloy din ang pag-agos ng lava sa tatlong gullies ng bulkan—Mi-isi, Bonga, at Basud—dahil sa walang patid na suplay ng lava mula sa crater.

Samantala, paminsan-minsan ang pagbuga ng lava, at sa kasalukuyan ay wala pang nakikitang senyales ng isang explosive eruption dahil nananatiling normal at walang makabuluhang pagbabago sa mga binabantayang parameter ng Bulkang Mayon.