Palasyo: Nepomuceno, mananatiling BOC chief

Nilinaw ng Malacañang noong Huwebes, 19 February 2026, na mananatiling Customs Commissioner si Ariel Nepomuceno, taliwas sa mga lumabas na ulat sa social media na siya ay papalitan.

“Ang kumakalat na sinasabing papalitan si Commissioner Ariel Nepomuceno ay wala pong katotohanan. Ang lumalabas na dokumentong iyan ay ibibigay natin mismo sa NBI dahil marami na ang umaabuso sa kanilang sinasabing freedom of expression,” ani Palace Press Officer at Presidential Communications Office Undersecretary Claire Castro sa isang briefing sa Palasyo.

Si Nepomuceno ay itinalaga noong 30 June 2025, habang ang diumano’y pekeng ‘appointment paper’ na may petsang 2 February 2026 ay kumalat online.

“Ipapaabot at ihahatid natin sa NBI ang dokumentong iyan upang maimbestigahan kung saan nanggagaling ang mga pekeng impormasyon,” dagdag pa niya.

Pagbabago sa Intelligence Division

Samantala, nagkaroon ng minor reshuffle sa Intelligence Division ng Bureau of Customs (BOC).

Sa isang liham na may petsang 12 December 2025, iniutos ni BOC-Intelligence Group Deputy Commissioner Romeo Allan Rosales ang pansamantalang pagtatalaga kay Paul Oliver Pacunayen, Intelligence Officer III ng BOC-Customs Intelligence and Investigation Office (CIIS), sa IG-Office of the Deputy Commissioner.

Ang hakbang ay “pending investigation ng Bureau of Customs sa diumano’y korapsyon” na kinasasangkutan ni Pacunayen, na may kasong kaugnay ng smuggling sa Port of Manila (POM).

“Hindi siya dapat lumahok sa anumang operational activities na labas sa saklaw ng pansamantalang assignment maliban kung may malinaw na pahintulot,” ayon sa kautusan, na nagdagdag na dapat siyang mag-ulat direkta sa IG-Office of the Deputy Commissioner at gampanan ang mga tungkuling inatas ni Rosales.

Gayundin, si abogado Allen Dela Cruz, pinuno ng Intelligence Division, CIIS-IG, ay pansamantalang itinalaga bilang Office Caretaker ng POM-Field Station ng CIIS, ayon sa utos ng BOC.

Si Dela Cruz ang responsable sa pang-araw-araw na operasyon ng POM, CIIS-IG, at sa pagpapatuloy ng mga gawain ng opisina.