Nasugatan ang driver ng isang 10-wheeler truck matapos itong bumangga sa isang poste ng kuryente sa westbound lane ng Ortigas Extension, sakop ng Barangay Rosario sa Pasig City.

Ayon sa Pasig Traffic Bureau, pauwi na sa Rizal ang driver matapos maghatid ng kargang aspalto nang mawalan umano ng preno ang sasakyan. Sa pagtatangkang makaiwas sa mas malaking pinsala at makahanap ng ligtas na pagbabanggaan, itinawid ng driver ang truck sa kabilang lane hanggang sa bumangga ito sa isang poste malapit sa isang gasolinahan.

Dahil sa lakas ng impact, wasak ang harapan ng truck at nagkalat ang semento sa tapat ng arko ng Dona Juliana Village. Nagdulot din ito ng power interruption sa mga establisimyento sa lugar at matinding abala sa daloy ng trapiko, lalo na’t kasabay ito ng rush hour.