Mga alegasyon ng pambabastos sa puntod, abusadong singil, umani ng galit

Napupuno ng galit ang mga residente ng Mogpog, Marinduque at mga karatig-bayan dahil sa umano’y serye ng iregularidad ng pamunuan ng Ala-Ala Memorial Park — mula sa sobra-sobrang bayarin hanggang sa sinasabing paglapastangan sa mga puntod.

Sa mga ulat na ipinadala sa DAILY TRIBUNE, inilahad ng mga residente ang galit sa anila’y mapang-abusong polisiya at pabigat na singil. Ayon sa kanila, bigla na lamang umanong dinoble o tripleng itinaas ang maintenance at renewal fees nang walang malinaw na paliwanag o konsultasyon.

Ikinuwento ni Dennis Mangcucang, isang lot owner, na wala umanong dayalogo bago ipinatupad ang mga bagong bayarin. Aniya, ipinilit pa raw ang one-year advance payment para sa maintenance.

Mas masakit, ayon kay Mangcucang, minarkahan pa ng pulang “X” ang puntod ng kanyang ina — isang eksenang aniya’y hindi niya inakalang mangyayari sa isang lugar na dapat ay sagrado.

Dagdag pa niya, may mga ulat din umano ng pagtanggal ng lapida, pagbabawal sa mga pamilya na mag-ayos o magpanatili ng kanilang mga mausoleum, at mararahas na pananalita sa tuwing sinusubukan nilang bumisita.

Isinalaysay rin niya ang isang insidente kung saan hininto ang isang libing dahil sa alitan sa bayarin, na nauwi sa sapilitang cremation ng yumao sa ibang bayan.

“Napakalaking kawalanghiyaan ito. Wala man lang respeto sa mga patay,” pahayag niya.

Habang naghahanda ng legal na hakbang, sinabi ni Mangcucang na nakipag-ugnayan na ang mga residente sa Department of Human Settlements and Urban Development (DHSUD). Pinayuhan silang tipunin at pormal na ihain ang kanilang mga reklamo para sa imbestigasyon.

May iba pang lot owners ang nagreklamo sa umano’y pagbabawal ng memorial park na kumuha sila ng sariling contractors para sa pagpapatayo ng mausoleum — isa pang polisiyang itinuturing nilang hindi makatarungan.

Sa social media, kinondena rin ng netizens ang isyu. Isang netizen ang nagpunto na may umiiral na mga batas, kabilang ang Code on Sanitation at Revised Penal Code, na nagpaparusa sa mga gawaing lumalapastangan sa mga libingan at nakasasakit sa damdaming panrelihiyon.

Sa kabila ng lumalakas na panawagan ng publiko, nananatiling tikom ang pamunuan ng Ala-Ala Memorial Park sa mga alegasyon.