7 patay sa pananalasa ng Bagyong Basyang sa Northern Mindanao

Umabot na sa pito ang kumpirmadong nasawi at pito rin ang sugatan matapos manalasa ang Bagyong Basyang sa Northern Mindanao.

Ayon kay Office of the Civil Defense (OCD) Region 10 Director Antonio Sugarol, apat sa mga nasawi ay dulot ng pagguho ng lupa sa Barangay Agusan, Cagayan de Oro City.

Sa bilang ng mga sugatan, dalawa ang mula sa Cagayan de Oro City, tatlo sa Gingoog City, at dalawa naman sa Iligan City. Mayroon ding isang indibidwal na iniulat na nawawala sa Tagoloan, Lanao del Norte.

Samantala, una nang iniulat ng Public Information Officer ng Iligan City Police Office na tatlo ang nasawi sa kanilang lungsod, subalit hindi pa ito beripikado ng OCD-10. Kabilang umano sa mga ito ang isang mamamahayag na inatake sa puso habang binabaha ang kanilang tahanan, at dalawang bangkay na narekober mula sa ilog.

Sa kabuuan, mahigit 40,000 pamilya ang naapektuhan ng Bagyong Basyang sa Northern Mindanao. Patuloy namang namamahagi ng pagkain at iba pang non-food items ang Department of Social Welfare and Development (DSWD) sa mga apektadong residente.