Bumilis sa 2% ang inflation sa Pilipinas nitong Enero mula sa 1.8% noong Disyembre, ayon sa Philippine Statistics Authority (PSA). Ito ang pinakamabilis na pagtaas ng inflation mula nang maitala ang 2.1% noong Pebrero 2025.

Gayunman, mas mababa pa rin ito kumpara sa 2.9% na inflation na naitala sa kaparehong buwan noong nakaraang taon.

Ayon kay National Statistician Dennis Mapa, pangunahing nagtulak sa pag-akyat ng inflation ang mas mabilis na pagtaas ng presyo ng pabahay, tubig, kuryente, gas, at iba pang uri ng petrolyo na umabot sa 3.3%. Malaki rin ang naging ambag ng pagtaas ng presyo sa restaurant at accommodation services na pumalo sa 4%.