Wala pang pahayag ang Malacañang kung dadalo si Pangulong Ferdinand Marcos Jr. sakaling imbitahan siya ng House Committee on Justice sa mga pagdinig kaugnay ng mga impeachment complaint na inihain laban sa kanya.

Nauna nang sinabi ni House Committee on Justice Chairman at Batangas Rep. Gerville Luistro na iimbitahan nila ang Pangulo sa impeachment hearing kung mapatutunayang sapat sa porma at nilalaman ang mga reklamong isinampa.

Gayunman, tiniyak ng Palasyo na igagalang ng Pangulo ang proseso alinsunod sa Saligang Batas. Ayon sa Malacañang, handa ang Pangulo at ang Palasyo na magsumite ng mga kinakailangang dokumento sakaling hilingin ito ng House Committee on Justice.

Sinabi ni Palace Press Officer Undersecretary Claire Castro na magpapatuloy ang Pangulo sa pagtupad ng kanyang mga tungkulin para sa kapakanan ng sambayanang Pilipino at hindi magiging hadlang ang usapin ng impeachment sa kanyang pamumuno. Dagdag pa ni Castro, naniniwala siyang ang paghahain ng impeachment laban sa Pangulo ay maituturing na isang pag-atake sa administrasyon, sapagkat hindi lamang ang punong ehekutibo ang maaapektuhan kundi pati na rin ang bansa at ang ekonomiya.