Hayden Kho, may pakilig sa asawang si Vicki Belo
Ibinahagi ni Hayden Kho ang birthday surprise niya para sa asawang si Vicki Belo sa pagdiriwang ng ika-70 kaarawan nito noong ika-25 ng Enero.
Sa Instagram, ipinakita ni Hayden ang isang video kung saan makikitang kasama niya ang nag-iisa nilang anak na si Scarlet Snow sa paghahanda ng sorpresa.
Aniya sa caption, “A birthday surprise exactly the way she likes it: simple, quiet, intimate. We love you, @victoria_belo. Happy birthday.”
Dakong alas-4:00 ng umaga pa lamang ay sinalubong na ng isang nakakakilig na sorpresa ang celebrity doctor, kabilang ang birthday balloons bilang pagbati.
Pagsapit ng alas-6:00 ng umaga, naghanda naman si Scarlet ng scrambled eggs para sa almusal ng kanyang ina.
Treasure hunt naman ang naging aktibidad bandang alas-1:00 ng hapon, kung saan kinailangang hanapin ng doktora ang kanyang regalo—isang silver Chanel bag.
Nagtapos ang video sa isang sweet na mensahe mula sa kanilang unica hija.